دبوس.وَتَعْظُمُ في عَينِ الصَّغيرِ صغارُها

دبابيس علي ابو وضاح 

في عام 344 هـ (955 م)، هاجم جيش ضخم من الروم بقيادة القائد “برداس فوقاس” إحدى أهم القلاع الإسلامية الحدودية وهي قلعة الحدث (تقع اليوم في منطقة مرعش جنوب تركيا)، ودمروها بالكامل وارتكبوا فيها مجزرة عظيمة……

حين وصل الخبر إلى حاكم حلب، الأمير سيف الدولة الحمداني، استشاط غضباً وجهّز جيشاً ضخماً للثأر من الروم واستعادة القلعة ، ورغم تحذير مستشاريه من صعوبة المعركة، لم يتردد سيف الدولة في التحرك…. 

وانتصر الجيش العربي انتصاراً ساحقاً على الروم ونجح في إعادة بناء القلعة وتحصينها وإجلاء الروم ، رغم أن المعركة كانت محفوفة بالموت ، حيث وصفها المتنبي بأنها كانت تجري كالموج المتلاطم……

عند عودة “سيف الدولة” منتصراً ، نظم أبو الطيب المتنبي قصيدة عصماء تكريماً لهذا الإنجاز العظيم الذي يعكس قوة الإرادة والشجاعة ، افتتحها ببيته الخالد الذي يرسخ مبدأ أن الأفعال العظيمة لا يقدم عليها إلا أهل العزم وأصحاب الهمم العالية فقال :

على قَدْرِ أهْلِ العَزْمِ تأتي العَزائِمُ

وَتأتي علَى قَدْرِ الكِرامِ المَكارمُ

وَتَعْظُمُ في عَينِ الصَّغيرِ صغارُها

وَتَصْغُرُ في عَينِ العَظيمِ العَظائِمُ

والقصيدة طويلة ومعروفة ولكن يهمنا منها هذان البيتان وعلى الأخص الشطرة الاولى من البيت الثاني التي تقول:

وَتَعْظُمُ في عَينِ الصَّغيرِ صغارُها

حيث يصور المتنبي في هذه الشطرة كيف تضخم النفوس الصغيرة الأمور التافهة وتراها عوائق مستحيلة ، أو تصورها انجازات عظيمة بينما يستصغر ذوو الهمم العالية الخطوب الجسام….

ويُبرز هذا التناقض قدرة الإنسان على تحديد حجم التحديات بناءً على طموحه وعزيمته….

وهذا يتجلى في خبر اعلنته وكالة السودان للأنباء عن اجتماع (منظمة دول أفريقيا والكاريبي والمحيط الهادئ) الذي عُقد في بروكسل ، حضره وزير المالية (فكي جبرين) وينص محتوى الخبر على أن:

وزير المالية قد حصل على “دعم الأعضاء” لإعفاء السودان من “كامل مديونيته” للمنظمة…..

عندما يسمع السامع اسم المنظمة وقولهم اعفاء السودان من كامل مديونيته ، يقول ديل ضربوا حمدوك بالقاضية ، ويشرئب عنقه ويكاد تأخذه المفاجأة الى مكان الضبان الازرق ما يعرفه….

حقيقة شي يدعو الى الضحك الأسيف….

تسمع قولة الكاريبي تقول معاهم شاكيرا؟….

لما تجي للحقيقة ….

اول حاجة تصدمك هي أن (منظمة دول أفريقيا والكاريبي والمحيط الهادئ) دي حاجة ما عندها أي لازمة منظمة كدا لا هي ضكر لا هي انتاية…..

حاجة كدا زي الحلمات ال في رقبة العتود….

لا هن بيضات ولا فيهن لحم ولا بيزيدن الجلد…..

والحاجة التانية لما تسأل عن معنى (كااااامل مديونية السودان) تجاه المنظمة تلقاها عبارة عن رسوم اشتراك عضوية السودان في المنظمة وتبلغ قيمته واحد مليون دولار فقط لا غير….

ايا والله زي مابقول لك…..

يعني وزير المالية والوفد (المرافغ) له سافروا من بورتسودان الى بروكسل مكلفين الدولة تذاكر طيران رايح جايي و(فنادغ) ونثريات والذي منه بمبلغ و(غدره) كم وكمين دولار عشان يحصلوا على اعفاء من متأخرات رسوم إشتراك عضوية البالغة مليون دولار…..

كلفت كم الرحلة دي؟

الكلف ال يشوه وجوهكم الاصلها مشوهة دي…..

علي النعمة المتنبي لو عارف انه سيأتي يوم يصل فيه الناس الى هذا المستوى من الهوان وتعظيم الصغائر كان غير الشطرة التانية من البيت وخلاها تقول

وتطرب لهذا الفعل البهائمُ…..

ياخي هي (منظمة دول أفريقيا والكاريبي والمحيط الهادئ) ذاتها ما عندها مهمة عشان تكون العضوية فيها مهمة ، كيان عبارة عن نادي للونسة وسبوبة للسفر والاقامة في فنادق بروكسل وخلاص….

فلا هي من مؤسسات البنك الدولي ولا هي مؤسسة تمويل ولا هي جهة إقراض ، ولا هي مؤسسة لدعم التنمية ولاهي جهة استشارية ولابتقدم دراسات ولا هي مؤسسة وجيهة الزول ممكن يفتخر بعضويتها ولا عندها قروش اصلا عشان تدين زول وتبقى عليهو مديونية….

وعمرنا ما سمعنا انه شتراكات العضوية تعتبر ديون…..

ما دفعت اشتراكك بطردوك وخلاص ديون شنو….

ذكرتوني نادي حلتنا زمان….

كان في يوم كدا عمك ود عوض كلم يجي يقيف وراي يجروني خمسين ، اتشاءمت منه قلت له انت بتقيف وراي لي شنو ؟

قال لي : عاوز الاشتراك

قلت الاشتراك كم

قال لي 10 جنيه

اديتو 120 جنيه قلت له سنة لي قدام ما عاوزك تقيف وراي….

يجي فكي جبرين معاهو وفد (مرافغ) يسافروا على حسابنا الى بروكسب عشان يجيب له اعفا من عمك ود عوض بتاع الكاريبي قايل نفسه خلاص يعني قضى على التضخم وسعر الدولار حا ينخفص والجنيه قيمته حا ترتفع؟

قوم لف….

انا أول مرة اشوف ناس فاشلين حتى في الكذب…..

والله حقو تشوفوا لكم زول كذاب يظبط لكم الكذب ، والله اخير لكم من جيش النائحين والنائحات المستأجرين والمستأجرات ال ما مستفيدين منهم ديل….

قال : “إعفاء السودان من كامل مديونيته”

طلس عبيط و(مغرف) و(مغذذ)……

يخسي عليكم على قول المرحومة سعاد الفاتح…..

اللهم بقدرتك أزح هذه الطغمة وهذه الغمة….

وأصلح حالنا وبدل احوالنا الى ماتحبه وترضاه…..

ثم السلام على الغبش المظلومين ولا سلام على القتلة والظالمين…..

أبووضاح