الزول السمح إلا شينته منكورة 

خالد فضل 

  أحب مكان بلدي السودان .. غرقت مركب في مياه البحر الألبض المتوسط من ضمن الضحايا سودانيون , خبر مكرر منذ عشرات السنين .. 

  لأن حسانو أعف حسان .. ياخي البنات السودانيات مطلوقات كاسيات عاريات في كافيهات (…….) , ونسوان (…) ديل كوم تاني (وكل نقطة بحرف ), والقونات سمعتهن وصلت لشريف نيجيريا , أما السوشيال ميديا فحدّث ولا حرج , بنات ما عدهن وليان . 

يا زول الجيش باع الخرطوم , مدني , سنجة , السوكي , الدندر , نيالا كاس زالنجي الضعين والفاشر زاتا بابنوسة والنهود والفولة والمجلد والله يستر من بيعة الأبيض , .. البرهان ده أكبر دعامي وخائن .. جيشن واحد شعب واحد …. والبرهان البطل القومي الذي دخل التاريخ زي ابراهيم بقال ..

الكيزان ديل أحسن ناس .. حرامية وفاسدين وتجار دين ومنافقين , باعوا البلد وفصلوا الجنوب وح يفصلوا دارفور وكردفان .. كلنا براؤون يا رسول الله ..

حمدوك ده عميل وخائن وفاشل .. رفع اسم السودان من قوائم الإرهاب .. ثبت سعر الدولار و …. الله لا كسب القحاطة .. أي كوز ندوسو دوس !!

حميدتي ده ذكاء اصطناعي .. الزول ده لو حي ما كان برضى الانتهاكات بتاعت جماعتو ديل .. مرتزق تشادي ..

الليلة يا قرنق أيامك انتهن .. والله قرنق ده وحدوي عشان كده الخواجات كتلوهو .. و …

ناس الأحزاب ديل كلهم فاسدين .. ياخي يا ريت لو الناس كانوا زي الأزهري والمحجوب ومبارك زروق ونقد وعبدالخالق محجوب و و و و … ياخي ديل ناس نضيفين مافيش زيهم ..

يا زول السودان ده ما بتنفع فيهو الحرية والديمقراطية , بس كمان عساكرنا .. و ..

نفس الزول الكاتل ولدك

حاكم بلدك

نفس الزول الكاتل ولدك

شال لروجو الفاتحة وقلدك

الزول المجاهد السمح يضع الورود أكاليلا على مقبرة لضحايا الإبادة والتطهير العرقي في رواندا .. نفس الزول يربط الحجارة على جثث ضحايا الإبادة الجماعية في ساحة الإعتصام ويقذفها في البنهر وليمة لأسماك النيل فتعدم القبر والشاهد حتى يضع فيه وردته اليانعة .. نفس الزول .

الزول السمح فات الكبار والقدرو إلا .. يفيض النيل نحيض نحنا .. يظل حال البلد واقف تقع محنة .

من طرائف المطاميس في العصر الذهبي , أنّ أحدهم سئل عن السر وراء سكره سريعا من أول كاس ؟ أجاب بكل عفوية : إنتو قايلين السكر ده من كتير يازول المسألة توفيق من رب العالمين ساي .. استغفر الله . نفس الزول …